Sidoo kale, 76 askari oo uu ku jiro taliye ku-xigeenka ciidanka Daraawiishta Puntland, Sarreeye Guuto Cadiweli Jaamac Ilig, ayaa ku dhaawacmay dagaalkaas sida uu sheegay afhayeenka howlgalka ka dhanka ah Daacish, General Maxamuud Faadhigo.
Afhayeenka ciidamada ayaa dhinaca kale sheegay in ciidamada Puntland ay dileen 115 xubnood oo ka tirsan kooxda Daacish. Wuxuu intaas ku daray in aanay jirin wax maxaabiis ah oo nolol lagu qabtay oo katirsan dagaalamayaasha kooxda Daacish.
Afhayeenku wuxuu sidoo kale xusay in ciidamada Puntland ay ku guuleysteen inay fashiliyaan miinooyin iyo diyaarado qaraxyo lagusoo xiray oo lagu soo weeraray furimaha ciidamada.
Si kastaba ha ahaatee, 48-kii saac ee lasoo dhaafay ma jirin wax dagaallo ah oo ka dhacay buuraha Calmiska. Ciidamada Puntland ayaa weli ku sugan goobihii lagu dagaalamay.
