Xarunta Dr. Ismaaciil Jimcaale ee Xuquuqda Aadanaha oo sheegtay in Xadgudubyada ka dhacaya Magaalada Muqdisho ay yihiin kuwo ka gudbay in la diiwaangeliyo

Axad, October 21, 2007(HOL):  Xarunta Dr. Ismaaciil Jimcaale ee Xuquuqda Aadanaha  oo ka mid ah Hay’adaha u dooda Xuquuqda Aadanaha ayaa waxay shaaca ka qaaday in xadgudubyada ka dhanka ah bani’aadannimada ee ka dhaca Magaalada Muqdisho ay yihiin kuwo dhaafay xadkii diiwaangelinta.

Madaxa Baarista iyo Xadgudubyada Xarunta Dr. Ismaaciil Jimcaale ee Xuquuqda Aadanaha ayaa sheegay in ay Magaalada Muqdisho ka dhaceen, welina ka socdaan xadgudubyo damiiri ah oo ka dhan ah bani’aadannimada, kuwaasi oo uu sheegay in ay geysanayaan dhinacyada isku haya Magaalada Muqdisho.

“ Waxa hadda socda wax la diiwaangelin karo waaba ka badan yihiin, Xadgudubyo bad ah ayaa socda oo loo geysanayo Dadka Soomaaliyeed, gaar ahaan Dadka Rayidka ah oo aan waxba galabsan, sidaas darteed haddii aan nahay Xarunta Dr. Ismaaciil Jimcaale ee Xuquuqda Aadanaha waxaan codsaneynaa in la joojiyo dhibaatada la gaarsiinayo Dadka rayidka ah”ayuu yiri C/llaahi Calas Jimcaale.

C/llaahi Calas Jimcaale oo sii hadlayay waxaa uu sheegay in ay ka codsanayaan dhinacyada Dowladda Federaalka iyo Kooxaha ka soo horjeeda in xabad joojin la sameeyo, in ay wada hadal sameeyaan, in ay Dib u heshiisiin run ah sameeyaan, in loo naxariisto dadka Soomaaliyeed oo dhibaateysan, isagoo intaas ku sii daray  in ay Beesha Caalamkana ugu baaqayaan in ay isu soo jiiddo dhinacyada isku haya Soomaaliya, gaar ahaan Magaalada Muqdisho.

“Xadgudubyada hadda socda waxay lid ku yihiin Shareecada Islaamka, Qaanuunnada Caalamiga ah, Dhaqanka Soomaaliyeed ee la aqooni jiray, haddii ay sii socdaana meeshan nolol kama jireyso, waxayna Magaalada Muqdisho isu bedeli  doontaa meel lama degaan ah oo lagu kala guuray” ayuu mar kale yiri C/llaahi Calas Jimcaale.

Sikastaba arrintu ha ahaatee, Hay’adaha u dooda Xuquuqda Aadanaha ee ka howlgala gudaha Dalka Soomaaliya ayaa mar kasta waxay soo saaraan baaqyo ay ku dalbanayaan in la joojiyo xadgudubyada ka dhaca Soomaaliya ee ka dhanka ah Bani’aadannimada, walow baaqyadooda ay noqdaan kuwo aaney dheg u dhigin dhinacyada ay ku socdaan ee xadgudubyada geysta.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia